ស្ត្រីចូលម្លប់ដើម្បីអ្វី?
ពីធីចូលម្លប់ ឬមង្គលចូលម្លប់ ឬហៅម្យ៉ាងទៀតថា
ចូលម្លប់បង្គ្រប់ការ ជាកាលកំណត់របស់ស្ត្រីគ្រប់ការ
ភាគច្រើននៅអាយុ១៤ឆ្នាំ។ ចាស់បុរាណ មានសេចក្តីថា
កូនស្រីចាប់ផ្តើមមានរដូវលើកដំបូង
អាចនឹងបន្តពូជពង្សវង្សត្រកូលបាន។ មាតាបិតា ក៏ចាប់ផ្តើម
ហាមប្រាណកូនក្រមុំមិនឲ្យចេញទៅណា ត្រូវនៅតែផ្ទះ
លុះដល់ថ្ងៃកំណត់ ទើបឲ្យចេញពីម្លប់បាន។ ជាទូទៅខ្មែរបុរាណ
រៀបចំទុកដាក់កូនស្រីឲ្យមានស្វាមី នៅអាយុ ១៥-១៦ឆ្នាំ
ព្រោះទិដ្ឋភាពសង្គមសម័យនោះ តែងប្រកាន់ទស្សនៈថា “មានកូនស្រីពិបាកណាស់ ដូចមានបង្គន់នៅមុខផ្ទះ”
ខុសឆ្គងបន្តិចបន្តួច ដូចសំអុយកេរ្តិ៍ឈ្មោះគ្រួសារទាំងមូលអញ្ចឹង។
ហេតុនេះបានជា មាតាបិតាខាងស្រី មិនពន្យារពេលវ័យគ្រប់ការ
ឲ្យនៅយូរ រហូតដល់២០ឆ្នាំនោះឡើយ។ ដូច្នេះ
ពីធីចូលម្លប់ជាមង្គលមួយ សម្រាប់ស្ត្រីខ្មែរ
ហើយជាឱកាសមួយនៃការអប់រំ ចិត្តគំនិត កាយ វាចា ចិត្ត
ខិតខំសិក្សាច្បាប់ស្រី វិជ្ជាមេផ្ទះ ដូចជាដេប៉ាក់
ធ្វើម្ហូបអាហារ... ថែរក្សារូបរាងកាយសម្បុរឲ្យស្រស់ស្អាត
ដើម្បីបំពេញលក្ខណៈ គុណសម្បត្តិ
រូបសម្បត្តិសម្រាប់កសាងគ្រួសារទៅថ្ងៃក្រោយ៕